КАБЕЛИЙН ТЕЛЕВИЗҮҮД ЯМАР ШАЛТГААНААР ҮНЭ НЭМСНЭЭ ХЭРЭГЛЭГЧИДДЭЭ ТАЙЛБАРЛАХ ХЭРЭГТЭЙ ГЭВ

17

Иргэдийн санал, хүсэлтийг хүлээн авах 70353511 утсанд кабелийн телевизийн үйлчилгээ үзүүлэгч нэр бүхий байгууллагууд сарын төлбөрөө нэмсэн атлаа гаралт нь муу, үе, үе тасарч байна гэсэн гомдол олон иргэнээс ирсэн. Үүний дагуу Засаг даргын орлогч С.Батжаргал “Агаарын суваг”, “Сансар”, “Хийморь” кабелийн телевизийн удирдлагуудтай уулзалт хийлээ.

Холбогдох байгууллагаас гарсан шийдвэрийн дагуу кабелийн телевизийн үйлчилгээ үзүүлэгчид иргэдэд тоон системийн үйлчилгээ үзүүлэх шаардлага бий болоод тодорхой хугацаа өнгөрч байна. Үүний дагуу Агаарын суваг, Сансар кабелийн телевизүүд шинэ давтамжид тохируулах үүднээс тоног төхөөрөмжийн шинэчлэл хийж өндөр чадлын станц Баян-Өндөр ууланд байгуулсан гэнэ. Гэтэл тус компаниудын хэд хэдэн давтамжийг нь “4G LTE” үйлчилгээ үзүүлэгч байгууллагуудад олгосонд сэтгэл дундуур байгаагаа “Агаарын суваг” компанийн төлөөлөл илэрхийллээ. “Сансар” кабелийн телевизийн хувьд гаргаж буй телевизүүдийнхээ дохиог нийслэлээс шилэн кабелиар хүлээн авдаг. Тиймээс зам, газар шорооны ажил хийх үед шилэн кабель гэмтээх тохиолдол цөөнгүй байдгаас үүдэж үе үе гарахгүй болдог гэнэ. “Шилэн кабелийн түрээсийн төлбөр нэмэгдсэн тул хураамж нэмэгдсэн. Одоо бид технологийн шинэчлэл хийж байна” гэж компанийн төлөөлөл хэллээ. Мөн  “Хийморь” кабелийн телевизийн гаралт муу байгаа нь хулгайгаар үздэг хэрэглэгчдээс болдог гэсэн тайлбарыг уулзалтад оролцсон төлөөлөл нь хийсэн юм.
Засаг даргын орлогч С.Батжаргал тэдэнд хандаж хэлсэн үгэндээ “Тоног төхөөрөмжид хөрөнгө оруулсан гэдэг нь хэрэглэгчдийн биш бизнесийн байгууллагуудын асуудал. Үнэ нэмэх, тодорхой шалтгаанаар тасалдах зэргийгээ хэрэглэгчиддээ ойлгуулах, ойр байх хэрэгтэй. Үүсээд байгаа асуудал бол хэрэглэгчдийг мэдээллээр хангах, ойлголцолд хүрч чадаагүй байдлаас үүдэж байгаа. Тиймээс гомдол гаргасан иргэдэд үнэ нэмсэн, тасалдсан зэрэг шалтгаанаа тайлбарлах үүргээ компаниуд биелүүлэх хэрэгтэй байна” гэлээ.
Эх сурвалж: Erdenet.mn
Анхааруулга: Уншигчдын бичсэн сэтгэгдэлд www.etzone.mn хариуцлага хүлээхгүй болно. Манай сайт ХХЗХ-н журмын дагуу зүй зохисгүй зарим үг хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэж үзнэ үү. Хэм хэмжээ зөрчсөн сэтгэгдлийг админ устгах эрхтэй.

17 Олон сэтгэгдэлтэй

Сэтгэгдэл үлдээх

This site uses Akismet to reduce spam. Learn how your comment data is processed.