АГААРЫН БОХИРДЛЫГ БУУРУУЛАХ МАСТЕР ТӨЛӨВЛӨГӨӨНИЙ 2 ДАХЬ ШАТ ХЭРЭГЖИНЭ

0

Эрдэнэт хотын агаарын бохирдлыг буруулах мастер төлөвлөгөөг 2013 онд баталсан. Уг төлөвлөгөө нь 2024 он хүртэл хэрэгжих бөгөөд одоогоор хоёр дахь үе шатыг хэрэгжүүлж эхлэхээр бэлтгэж байна. Үүний хүрээнд аймгийн ЗДТГ-ын Хөрөнгө оруулалт, хөгжлийн бодлого төлөвлөлтийн хэлтсээс “Эрдэнэт хотын агаарын бохирдлыг бууруулах арга зам” сэдэвт хэлэлцүүлгийг зохион байгууллаа. Хэлэлцүүлэгт мэргэжлийн байгууллагууд, судлаач, эрдэмтэд болон төр захиргааны байгууллагын мэргэжилтнүүд оролцлоо.

Манай хотын агаар дахь том ширхэгт тоосны хэмжээ стандартад заасан хэмжээнээс 2014 онд 62 хувь, 2015 онд 51.4 хувь, 2016 онд 56.7 хувиар тус тус давсан үзүүлэлттэй гарсан байна. Түүнчлэн сүүлийн 10 жилийн байдлаар хүхэрлэг хий хэвийн, азотын давхар исэл бага зэргийн бохирдолттой, нүүрс төрөгчийн дутуу исэл хэвийн, нарийн ширхэгт тоос дунд зэргийн бохирдолттой гэсэн судалгааг Ус цаг уур орчны шинжилгээний албанаас танилцууллаа. Дээр дурдсан үзүүлэлт нь хүйтний улиралд хэт мэдрэг, зүрх, судас, амьсгалын замын архаг өвчтэй тэр дундаа гуурсан хоолойн багтраа өвчтэй хүмүүсийн эрүүл мэндэд сөрөг нөлөөлөл үзүүлдэг байна.
Хотын агаарыг бохирдуулагч үндсэн 5 эх үүсвэр байдаг гэж үздэг. Тодруулбал, Эдгээрт гэр хорооллын айлуудын яндан, үйлдвэрийн тэсэлгээнээс гарч байгаа болон хөрсний элэгдлээс шалтгаалсан тоосонцор, ажиллаж буй хоёр цахилгаан станц, автомашинаас ялгарч буй утаа багтаж байгаа юм.
Төр захиргааны байгууллагуудаас бохирдлыг бууруулах зорилгоор өнгөрсөн жилүүдэд сайжруулсан зуух 5500 орчим, 2 тарифт тоолуур 2500 орчим, 530 гаруй тонн сайжруулсан түлшийг хөнгөлөлттэй үнээр олгосон. Үүний үр дүнд агаарын чанарын үндсэн дөрвөн үзүүлэлтээс нүүрс хүчлийн давхар ислийн хэмжээ буурсан талаар ЗДТГ-ын Хөрөнгө оруулалт, хөгжлийн бодлого төлөвлөлтийн хэлтсийн дарга ярьлаа.
Хэлэлцүүлгийн үеэр зөрүүтэй байгаа бохирдуулагч эх үүсвэрийн тоог тодорхой болгох, вокзалын орчимд агаарын чанарын пост байгуулах шаардлагатай талаар мэргэжлийн байгууллагын төлөөлөл ярьлаа. Учир нь одоогоор зөвхөн хотын төв болон гэр хорооллын агаарын чанарыг хэмжих пост ажиллаж байгаа юм.
Erdenet.mn
Анхааруулга: Уншигчдын бичсэн сэтгэгдэлд www.etzone.mn хариуцлага хүлээхгүй болно. Манай сайт ХХЗХ-н журмын дагуу зүй зохисгүй зарим үг хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэж үзнэ үү. Хэм хэмжээ зөрчсөн сэтгэгдлийг админ устгах эрхтэй.

Сэтгэгдэл үлдээх

This site uses Akismet to reduce spam. Learn how your comment data is processed.