Хотын амьдрал

ЦЭЦЭРЛЭГИЙН ХҮҮХДИЙН ШИНЖИЛГЭЭГ АЖЛЫН ӨДРҮҮДЭД АВЧ БАЙНА

2018/08/22

2018-2019 оны хичээлийн жилд цэцэрлэгт явах хүүхдүүд шээсний шинжилгээ, цагаан хорхойн шинжилгээг өгсөн байх шаардлагатай.

Шээсний шинжилгээ өгсөнөөс хойш 7 хоног, цагаан хорхойн шинжилгээ өгсөнөөс хойш 1 сарын хугацаанд хүчинтэй байдаг. Хичээлийн шинэ жил ойртох үеэр шинжилгээ өгөх иргэдийн дараалал үүсч ачаалал ихэсдэг тул цагаан хорхойн шинжилгээг 8-р сарын 13-аас доорх цагийн хуваарийн дагуу авч эхэлсэн.

Тиймээс иргэд Бүсийн оношилгоо эмчилгээний төвд үнэ төлбөргүй, Онош лаборатори, Талын булаг эмнэлэгийн лаборатори, Эрдэнэт сувиллын цогцолбор, Медипас төв эмнэлэгт 2000-3000 төгрөгийн төлбөртэйгөөр 8-р сарын 31-ийг хүртэл цагаан хорхойн шинжилгээг өгөх боломжтой.

Бүсийн оношилгоо эмчилгээний төвд шинжилгээ өгөхийн тулд харьяа өрхийн эрүүл мэндийн төвөөс “Цагаан хорхой илрүүлэх” гэсэн илгээх бичиг авах бөгөөд бусад лабораториудад өрхийн эрүүл мэндийн төвөөс бичиг авах шаардлагагүй. Хэрэв 2018 оны 6-р сарын 1-ээс хойш цусан суулга өвчнөөр өвдсөн тохиолдолд хүүхдийн өтгөнд эмгэг төрөгч илрүүлэх шинжилгээг цагаан хорхойн шинжилгээтэй хамт өгөх юм.

Хепатит А өвчний эсрэг дархлаажуулалтын 1, 2-р тунд бүрэн хамрагдсан хүүхдүүд шээсний шинжилгээ өгөх шаардлагагүй. Эцэг эхчүүд цагаан хорхойн шинжилгээний хариу болон вакцины карт, /Эх хүүхдийн ягаан дэвтэр/ -ээ цэцэрлэгийн эмчид шалгуулж бүртгүүлнэ.

Хэрэв хепатит А өвчний дархлаажуулалтад бүрэн хамрагдаагүй болон хоцорсон бол дархлаажуулалтад нөхөн хамрагдаж, шээсний шинжилгээг өгсөнөөр цэцэрлэгт элсэх юм. Шээсний шинжилгээг Өрхийн эрүүл мэндийн төвүүд болон Онош лаборатори, Талын булаг эмнэлэгийн лаборатори, Эрдэнэт сувиллын цогцолбор, Медипас төв эмнэлэгүүдэд 1500-2500 төгрөгийн төлбөртэйгөөр авна. Дээрх зааврын дагуу шинжилгээнд хамрагдсан бол өрхийн эрүүл мэндийн төвөөс “Эрүүл бойжиж байгаа” гэсэн бичгийг авах шаардлагагүй.