ЦАХИМ ЭРҮҮЛ МЭНД ТӨСЛИЙГ ХЭРЭГЖҮҮЛЭХ АЖЛЫН ХЭСГИЙН ХУРАЛДААН БОЛЛОО

0
Like
Like Love Haha Wow Sad Angry

Монгол улсын Засгийн газрын Төрөөс эрүүл мэндийн талаар баримтлах бодлогын хүрээнд Орхон аймгийн Эрүүл мэндийн байгууллагуудад “Цахим эрүүл мэнд” төслийг хэрэгжүүлэхээр шийдвэрлэсэн бөгөөд Орхон аймгийн Засаг даргын 2019 оны 03 дугаар сарын  27-ны өдрийн 201 дүгээр захирамжаар Засаг даргын орлогч А.Түвшинжаргалаар ахлуулсан ажлын хэсэг байгуулагдсан.

Орхон аймгийн хэмжээнд ЭМГ, БОЭТ, “Медипас” төв эмнэлэг болон 8 өрхийн эрүүл мэндийн төв, хувийн хэвшлийн 11 ортой эмнэлэг, клиник 56, эм ханган нийлүүлэх байгууллага 8, эмийн сан 57, нийт 137 эрүүл мэндийн байгууллага үйл ажиллагаа явуулж байна. Эрүүл мэндийн байгууллагуудыг цахим нэгдсэн программ хангамжтай болгосноор хүн амын эрүүл мэнд, тусламж үйлчилгээний мэдээ мэдээллийг цаг алдалгүй солилцох, үйлчлүүлэгчдийн эрүүл мэндийн байдлыг хянах, урьдчилан сэргийлэх, эрүүл мэндийн боловсролыг дээшлүүлэх өргөн боломж нээгдэнэ.
Мөн аймгийн хэмжээнд нийт иргэдэд орчин үеийн шаардлагад нийцсэн эрүүл мэндийн оношилгоо, түргэн шуурхай, нэн шаардлагатай үйлчилгээг авах нөхцөлийг бүрдүүлэх, энэхүү системээр дамжуулан эрүүл мэндийн үйлчилгээний чанар, хүртээмжийг сайжруулах, ард иргэдийн хүсэл сонирхол нь эрүүл мэндийн тусламж үйлчилгээг цаг алдалгүй авах, хоорондын нягт уялдаа бүхий байгууллагаар үйлчлүүлэх нь оношилгоо, эмчилгээний алдаа, үйлчилгээ хоцорсноос үүдэлтэй хүндрэл, нас баралт багасах зэрэг олон давуу байдал үүсгэх үндэслэл болно.
Эрүүл мэндийн салбарын үйл ажиллагаа нэгдсэн цахим сүлжээнд холбогдсоноор дундын мэдээллийн бааз үүсэх бөгөөд иргэдийн хүлээгдэл, цаг товлолт зэргийг ч цахимаар авах боломж бүрдэх юм.
Манай аймгийн хувьд 2018 оны байдлаар 344 эмч 436 сувилагч, мэдээллийн технологийн 5 мэргэжилтэн, 693 компьютер, 217 принтертэй, бүх эмнэлгүүд интернеттэй, дотоод сүлжээтэй байдаг ч өнөөг хүртэл аймгийн хэмжээнд ЭМБ-уудыг холбосон нэгдсэн систем, мэдээллийн бааз суурь байхгүй байдаг. Цахим эрүүл мэнд төслийг хэрэгжүүлэхэд зориулан 2019 оны төсөвт 200 сая төгрөг тусгаад байгаа бөгөөд нийт 355 сая орчим төгрөг шаардлагатай байгаа тооцоо гарчээ.
      Ажлын хэсгийн энэ удаагийн хуралдаанаар тус төслийг хэрхэн хэрэгжүүлэх арга зам, тулгамдаад байгаа асуудал, мэдээллийн бааз суурийн аюулгүй байдал зэрэг асуудлыг хөндөн ярилцав.
Мэдээллийн төв
Анхааруулга: Уншигчдын бичсэн сэтгэгдэлд www.etzone.mn хариуцлага хүлээхгүй болно. Манай сайт ХХЗХ-н журмын дагуу зүй зохисгүй зарим үг хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэж үзнэ үү. Хэм хэмжээ зөрчсөн сэтгэгдлийг админ устгах эрхтэй.

Сэтгэгдэл үлдээх

This site uses Akismet to reduce spam. Learn how your comment data is processed.