Туркт суугаа ОХУ-ын Элчин сайдыг буудаж хөнөөлөө

0
Like
Like Love Haha Wow Sad Angry

Путин аллагын захиалагчийг олохыг даалгалаа

ОХУ-аас Туркт суугаа Элчин сайд Андрей Карловыг хөнөөсөн хэргийн цаад эзнийг зайлшгүй олж мэдэх ёстой хэмээн тус улсын төрийн тэргүүн Владимир Путин мэдэгджээ. “ОХУ-ын Тагнуулын төв хорооноос хэрэг үүсгэж, шалгаж эхэлсэн. Энэ хэргийг илрүүлэхийн тулд ажлын хэсэг Анкарад очиж ажиллана” хэмээн Кремльд болсон шуурхай уулзалтын үеэр Путин хэлсэн байна.

Путин түүний талаар “Карлов цэрэг хүний ёсоор амь үрэгдлээ. Эх орныхоо даалгаврыг нэр төртэй биелүүлж, Туркийн эрх баригчидтай сайн харилцаатай, бусад улс төрийн хүчнүүдэд нэр хүндтэй, хүндлэл хүлээсэн манай шилдэг дипломатч байсан” хэмээгээд, “өндөр боловсролтой, найрсаг, энэрэнгүй нэгэн” гэж тодотгожээ.

  • Туркийн цагдаагийн ажилтан ОХУ-аас Туркт суугаа Элчин сайд Андрей Карловыг буудаж, амь насыг нь хөнөөжээ.

Анкара хотод даваа гаригт /2016.12.19/ уран зургийн үзэсгэлэнгийн нээлтийн үеэр болсон энэ аллагын шалтгаан нь ОХУ Сирийн асуудалд оролцож, Алеппо хотыг босогчдоос чөлөөлөхөд тусалсан явдал гэж үзэж байна. Туркийн дотоод хэргийн сайд Сулейман Соилу зэвсэгт этгээдийг 22 настай, Туркийн цагдаагийн офицер Мевлут Мерт Алтинтас гэгч байсныг мэдээлсэн байна.

Тэрбээр Элчин сайдад халдахаар буу гаргаж ирэх үедээ “Алеппог мартах хэрэггүй”, “Аллах Акбар”, “Сирийг битгий март” хэмээн хашгичиж байжээ. Одоогоор түүний ямар нэгэн гэмт бүлэглэлд харьяалагддаг эсэх нь тодорхойгүй байна.

Элчин сайд Андрей Карловыг буудан хороож буй бичлэг үлдсэн бөгөөд үүнийг ОХУ-ын Гадаад хэргийн яамнаас “Террорист халдлага” хэмээн үзэж буйгаа мэдэгдсэн байна. ОХУ-ын тагнуул болон мөрдөн байцаах ажилтнууд Туркт болсон хэрэг дээр ажиллахаар тус улсад очих талаар Путины хэвлэлийн төлөөлөгч Дмитрий Песков ярьжээ

Хэргийн дараа Туркийн ерөнхийлөгч Тайип Эрдоган ОХУ-ын төрийн тэргүүн Владимир Путинтай утсаар ярьж, энэхүү харамсалтай хэрэг хоёр орны диломат харилцаанд сөргөөр нөлөөлөхгүй гэдэгт найдаж буйгаа илэрхийлээд, алуурчдыг илрүүлэхэд хамтран ажиллахаар ярилцжээ. Туркийн ерөнхийлөгч Анкара дахь ОХУ-ын элчин сайдын яамны хамгаалалтыг чангатгажээ.

ОХУ-ын ерөнхийлөгч Владимир Путин болсон явдалтай холбогдуулж мэдэгдэл хийгээд байна. Тэрбээр энэхүү эмгэнэлт явдлыг “Орос-Туркийн харилцааг муутгах, цаашлаад Сирийн хямралыг дэврээх гэсэн өдөөн хатгалга. Энэ бүхний хариуд Москва  “Терроризмтай тэмцэх тэмцлийг өргөжүүлнэ. Алуурчид үүнийг удахгүй мэдрэх болно” гэлээ.

Путин амь үрэгдсэн Элчин сайд Карловыг “Сайн дипломатч” байсныг дурсаад, төрийн одон медалиар нэхэн шагнахыг албаныханд үүрэг болгожээ. Мөн тэрбээр гадаад орнуудад суугаа дипломат төлөөлөгчдийн хамгаалалтыг чангатгах үүрэг өгсөн байна.   

Анхааруулга: Уншигчдын бичсэн сэтгэгдэлд www.etzone.mn хариуцлага хүлээхгүй болно. Манай сайт ХХЗХ-н журмын дагуу зүй зохисгүй зарим үг хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэж үзнэ үү. Хэм хэмжээ зөрчсөн сэтгэгдлийг админ устгах эрхтэй.

Сэтгэгдэл үлдээх

This site uses Akismet to reduce spam. Learn how your comment data is processed.