ӨНГӨРЧ БУЙ ДОЛОО ХОНОГТ ЭРДЭНЭТЭД ЮУ БОЛОВ?

0
Like
Like Love Haha Wow Sad Angry

Орхон аймагтай зэргэлдээ орших Булган аймгийн Бугат, Булган суманд малын гоц халдварт шүлхий өвчний сэжигтэй тохиолдол бүртгэгдлээ. Тиймээс Булган аймгийн төвөөс Төлүүгийн даваа хүртэл голомтын бүс тогтоожээ. Иймд иргэдийг тус сумын нутгаар зорчихгүй байх, зорчсон тохиолдолд ариутгал халдваргүйжүүлэлт хийх хэрэгтэйг  мэргэжлийн байгууллагууд анхаарууллаа.

Орхон аймагт “Оюутан цэрэг” хөтөлбөр буюу “Оюутан цэрэгт” цэргийн мэргэжил олгох сургалт 2 дахь жилдээ явагдах гэж байна. Өнгөрсөн онд уг сургалтыг орон нутагт зохион байгуулахдаа 100 оюутныг хамруулсан. Энэ онд мөн тооны залуусыг хамруулах болсон талаар аймгийн Цэргийн штабаас мэдээллээ.

Засаг дарга Д.Батлут энэ сарын 26-нд А/93 захирамж гаргаж аймгийн хэмжээнд өвөл, хаврын улиралд хурдан морины уралдаан зохион байгуулахыг хориглолоо. Уг захирамжийн хэрэгжилтэд хяналт тавин ажиллахыг Цагдаагийн газар, Эрүүл мэндийн газар, Гэр бүл, хүүхэд залуучуудын хөгжлийн газарт үүрэг болгосон юм.

Орхон аймгийн ЗДТГ-ын дарга Д.Соёлчхүүгийн санаачилгаар өнгөрсөн оны 9 дүгээр сараас эхлэн манай аймагт “Сэтгэлийн анир” төсөл хэрэгжиж эхэлсэн. Төслийн баг Ерөнхий боловсролын сургууль тус бүр дээр ахлах ангийн сурагчдын тооноос хамаарч 10-14 хоног ажиллаж байгаа бөгөөд одоо 5-р сургууль дээр ажиллаж байна.

“Сэтгэлийн анир” төсөл хэрэгжиж эхэлснээс хойш ЕБС-ийн 8-12-р ангийн 6113 сурагчид хүрч ажиллажээ.  Тухайлбал 8-12-р ангийн 4171 сурагч сэтгэл зүйн 5 төрлийн  судалгаанд хамрагдаж сэтгэл зүйн бүх нийтийн болон оролцооны “Мундаг хүүхэд” сэдэвт 3 цагийн сургалтанд хамрагдаж, 1017 сурагч сэтгэл зүйн ганцаарчилсан зөвлөгөө авсан байна.

Орхон аймгийн Засаг дарга Д.Батлут болон аймгийн удирдлагууд 2017 оны 1 дүгээр сарын 5-ны өдрөөс эхлэн 2 дугаар сарын 7-ны хооронд Орхон аймгийн бүх багуудаар болон төрийн байгууллагын албан хаагч нартай уулзалт зохион байгуулсан билээ. Иргэдээс гарсан санал, шүүмжлэлийн мөрөөр асуудлуудыг багцлан 76 заалт бүхий ажлын төлөвлөгөө боловсруулан аймгийн Засаг даргын дэргэдэх Зөвлөлийн хурлаар хэлэлцүүлэн батлуулж төрийн болон төрийн өмчит байгууллагуудад хүргүүлэн ажил хэрэг болгон хэрэгжүүлж байна.

Энэ талаар өнөөдөр Орхон аймгийн Засаг даргын орлогч А.Түвшинжаргал болон ЗДТГ-ын хэлтэсийн дарга нар сэтгүүлчдэд хэвлэлийн бага хурал зохион байгууллаа.

Монгол Ардын Намын 97 Жилийн Ой, Эх Орончдын Өдрийн Баярыг тохиолдуулан төр, нийгмийн зүтгэлтэн А.Амарын хөшөөнд цэцэг өргөж, баярын хурал зохион байгууллаа. Энэ үеэр 97 залуу МАН-д элсэж батлахаа гардан авлаа.

Өнгөрсөн оны сүүлээр Орхон аймаг БНСУ-ын Ёсү хоттой хамтран ажиллах “Санамж бичиг” байгуулсан. Үүний хүрээнд тус хотод хөдөлмөр эрхлэх хүсэлтэй иргэдийг  гурван сарын хугацаатай ажиллуулахаар болсон. Иргэдийг бүртгэх болон ажиллах нөхцөл, цалин, хангамжийн асуудлаар хоёр тал санал солилцож хамтран ажиллах гэрээ байгуулахаар төлөвлөгдөж байна. Гэхдээ  ирэх зургаадугаар сарын 23-нд БНСУ-д орон нутгийн сонгууль болох тул Орхон аймгаас ажилтан авах асуудлыг  түр хугацаагаар хойшлуулах саналыг БНСУ-ын  Ёсү хотоос ирүүлжээ.

Мэдээллийн төв
Анхааруулга: Уншигчдын бичсэн сэтгэгдэлд www.etzone.mn хариуцлага хүлээхгүй болно. Манай сайт ХХЗХ-н журмын дагуу зүй зохисгүй зарим үг хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэж үзнэ үү. Хэм хэмжээ зөрчсөн сэтгэгдлийг админ устгах эрхтэй.

Сэтгэгдэл үлдээх

This site uses Akismet to reduce spam. Learn how your comment data is processed.