ЦАГААНЧУЛУУТ БАГТ БАРИГДСАН ЦЭЦЭРЛЭГТ 3 БАГИЙН ХҮҮХДҮҮД СУРАЛЦАНА

0
Like
Like Love Haha Wow Sad Angry

Аймгийн Засаг даргын орлогч А.Түвшинжаргал Цагаанчулуут болон Баянбулаг багт баригдаж буй цэцэрлэгийн явцтай танилцлаа.

Цагаанчулуут багийн 280 хүүхдийн цэцэрлэгийн барилгын ажил бүрэн дууссан байна. Уг ажилд орон нутгийн төсвөөс 2.4 тэрбум төгрөг зарцуулсан бөгөөд гүйцэтгэгчээр нь “Номун дөлгөөн” ХХК ажилласан юм. Тус цэцэрлэгт Цагаанчулуут, Рашаант, Ихзалуу багийн хүүхдүүд суралцана.

Уг барига нь 12 ангитай, спорт, урлагийн зал нь тусдаа, өрөө бүр аврах гарцтай. Түүнээс гадна анги бүрт камер байрлуулжээ. Зураг төсөл, дотоод засал зэрэг нь орчин үеийн стандартад бүрэн нийцсэн гэдгийг мэргэжлийн хүмүүс онцлон хэлж байлаа. Дээрх цэцэрлэгийг 26-р цэцэрлэг гэж нэрлэсэн бөгөөд 42 ажлын байр шинээр бий болжээ.

Тэгвэл Баянбулаг багт баригдаж буй 150 хүүхдийн цэцэрлэгийн барилгын ажил 80 орчим хувьтай үргэлжилж байна. Энэ барилгын ажлыг “Хялганат нуга” ХХК гүйцэтгэж буй. Нийт санхүүжилт болох 1 тэрбум 77 сая төгрөгийг Улсын төсвөөс бүрэн шийдвэрлэсэн. Одоогоор гадна инженерийн шугам сүлжээний ажил бүрэн дууссан, дотоод заслын ажил хийгдэж байгаа талаар гүйцэтгэгч компанийн төлөөлөл ярьлаа. Дээрх 2 цэцэрлэгийн үйл ажиллагаа ирэх хичээлийн жилд буюу 9-р сарын 1-нд эхлэх юм.Түүнээс гадна 18-р цэцэрлэгийн өргөтгөлд энэ онд Улсын төсөвт 800 сая төгрөг суусан. Гэхдээ барилгын нийт өртөг нь 2,3 тэрбум төгрөг юм. Иймд Аймгийн Засаг даргын орлогч А.Түвшинжаргал үлдсэн санхүүжилтийг шийдвэрлэхэд шаардлагатай арга хэмжээг авахыг холбогдох албан тушаалтнуудад өглөө. Одоогоор тус цэцэрлэгт 7 бүлэгт 253 хүүхэд суралцаж байна. Эдгээрээс 3 бүлгийн 96 хүүхэд нь А корпусдаа буюу 1970-аад онд ашиглалтад орсон тоосгон байшинд байрладаг байна. 18-р цэцэрлэгийн өргөтгөл нь одоо байгаа хүчин чадал дээр нь 150 хүүхэд нэмэх боломжийг бүрдүүлэх аж. Дашрамд дурдахад, Энэ онд Рашаант багт 250 хүүхдийн сургууль, Яргуйт, Булаг багт тус бүр нь 150 хүүхдийн хүчин чадалтай цэцэрлэг шинээр баригдахаас гадна Эрдэнэт” цогцолбор сургуулийг өргөтгөж 928 хүүхдийн багтаамжтай болгох ажил хийгдэнэ. Эдгээр нь бүгд Улсын төсвөөс санхүүжих юм.

Анхааруулга: Уншигчдын бичсэн сэтгэгдэлд www.etzone.mn хариуцлага хүлээхгүй болно. Манай сайт ХХЗХ-н журмын дагуу зүй зохисгүй зарим үг хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэж үзнэ үү. Хэм хэмжээ зөрчсөн сэтгэгдлийг админ устгах эрхтэй.

Сэтгэгдэл үлдээх