Хятад улс Тайванийн ойролцоо цэргийн сургуулилалт хийхээ зарлалаа

0
295

АНУ-ын Төлөөлөгчдийн танхимын дарга Нэнси Пелоси өчигдөр Тайваньд очсон. Пелосигийн айлчлалыг Хятад эсэргүүцэж, хэрвээ очсон тохиолдолд таагүй үр дагавар дагуулахыг анхааруулж байв. Гэвч Пелосиг газардсаны дараа Хятадын тал мэдэгдэл хийж, Тайванийн ойролцоо цэргийн сургуулилалт хийхээр болсноо зарлалаа.

БНХАУ-ын ГХЯ-наас Пелосигийн айлчлалыг эсэргүүцэж буйгаа илэрхийлээд, “Хятадын засгийн газар, ард түмний үндэсний бүрэн эрх, нутаг дэвсгэрийн бүрэн бүтэн байдлыг хамгаалах эрс шийдэмгий чанар, хүсэл зориг, чадварыг хэн ч дутуу үнэлж болохгүй” гэжээ.

Пелосиг Тайпэй хотноо ирэхэд Хятадын хэвлэл мэдээллийн хэрэгслээр Хятадын цэргийн онгоцнууд Тайванийг чиглэн нисэж байна гэж мэдээлэв. Үүний дараа ойрын хугацаанд /мягмар гарагаас/ Тайванийн ойролцоо хэд хэдэн удаагийн ажиллагаа явуулна гэж мэдээлсэн ч удалгүй Синьхуа агентлаг “цэргийн сургуулилалт хийнэ” хэмээн тодотгосон байна.

Пелосиг Тайваньд газардсаны дараа “Манай Конгрессын төлөөлөгчид Тайваньд айлчилж байгаа нь Америк ардчилсан Тайванийг дэмжиж байгаагийн илрэл юм. Дэлхий нийтээрээ автократ, ардчилал хоёрын аль нэгийг сонгохын өмнө нүүр тулгараад байгаа энэ цаг үед АНУ 23 сая иргэнтэй Тайваньтай эв санааны нэгдэлтэй байгааг харуулах нь маш чухал болоод байна” гэв.

Хятадын байлдааны онгоцнууд Тайваний хоолойг зааглах шугамын ойролцоо хэд хэдэн нислэг хийсэн байна. Даваа гарагаас хойш Хятадын цэргийн хэд хэдэн хөлөг онгоц Хятад, Тайванийг тусгаарладаг албан бус хилийн ойролцоо байгаа юм.

“Ройтерс” агентлагийн мэдээлснээр, Хятадын сөнөөгч онгоц удаа дараа тактикийн маневр хийж, тусгаарлах шугамд богино хугацаанд “хүрч”, хоолойны хажуу руу буцаж ирсэн байна. Тайванийн сөнөөгч онгоцнууд мөн тэдний талд агаарын орон зайд эргүүл хийжээ. Гэхдээ хоёр талын онгоцнууд  шугам давахгүй байгаа аж.

Тайванийн Батлан ​​хамгаалах яам мягмар гарагт хийсэн мэдэгдэлдээ “дайсны заналхийлэлд” зохих ёсоор хариу өгөх болно гэжээ. Хятадын зүүн өмнөд хэсэгт орших Шямэнь хотын оршин суугчид мягмар гарагт хуягт машинууд идэвхтэй хөдөлж байгааг мэдээлж, гэрэл зургуудыг интернэтэд нийтэлсэн байна.

Эх сурвалж: ВВС

ЭНЭ МЭДЭЭНД ӨГӨХ ТАНЫ СЭТГЭГДЭЛ?
+1
0
+1
0
+1
0
+1
0
+1
0
+1
0
+1
1
Анхааруулга: Уншигчдын бичсэн сэтгэгдэлд www.etzone.mn хариуцлага хүлээхгүй болно. Манай сайт ХХЗХ-н журмын дагуу зүй зохисгүй зарим үг хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэж үзнэ үү. Хэм хэмжээ зөрчсөн сэтгэгдлийг админ устгах эрхтэй.