Аймгийн ИТХ-ын ээлжит бус XII хуралдаан цахимаар  хуралдаж “Төсөвт зохицуулалт хийх тухай”  асуудлыг хэлэлцэв.  Баяр наадмын өмнөх аймгийн ИТХ-ын хуралдаанаар баталсан 2023 төсвийн тодотголд  “Эко” хорооллын дулаан хангамжийн шугам сүлжээг  хэсэгчлэн солих  ажлын төсөвт өртөг  543 сая төгрөг,  20-р сургуулийн гадна суурилуулсан дулааны узельд барилга барих ажлын төсөвт өртгийг тусгасан.  

“Эко” хорооллын тухайд  2019 оны халаалтын улирлаас эхлэн нийт 20 гаруй удаа гэмтэл гарсан.   Өнгөрсөн гуравдугаар сарын 15-17-ны хооронд нийт 80 метр газар ухаж 14 удаагийн гэмтэл гарсныг тус тус засварласан юм.   Өнгөрсөн наймдугаар сард  тус хорооллын дулаан хангамжийн шугам сүлжээг  хэсэгчлэн солих  ажлын тендер зарласан ч  амжилтгүй болсон.  Тиймээс дахин тендер зарлаж цаг алдахгүйгээр хүйт орохоос урьтаж УДХТ-өөс сувагт 5 хос 240м  шугамыг шинээр татах  ажлыг  Болзошгүй аваарын зардалд шилжүүлэн гэрээгээр гүйцэтгүүлэхээр  ИТХ-ын олонхын саналаар шийдвэрлэв. 

“Эрдэнэт Ус” Дулаан түгээх сүлжээ ОНӨХК туслан гүйцэтгэгчээр арга зүйн зөвлөгөө өгч, хяналт тавьж ажиллах бөгөөд тус  компаниас материалын нийлүүлэлтээс шалтгаалж гэрээ хийснээс хойш 20 хоногийн хугацаанд шугамыг шинэчилж, ашиглалтад оруулна гэлээ.  Тус хороололд 113 өрх, айл байгаагаас инженерийн шугам, сүлжээний гэмтлээс шалтгаалж 83 айл өнөөдрийн байдлаар халаалтгүй байгаа юм.

Аймгийн болзошгүй аваарын зардлаас 2022 онд XX сургуулийн гадна талд 1200 квт-ын хүчин чадалтай халаалтын зуух суурилуулсан.   Уг узелийн гадна талд   196 сая төгрөгийн өртөг бүхий 4*6 метрийн хэмжээтэй металл карказтай, эрдэс хөвөн сендвичэн барилга барихаар төлөвлөж буй. Мөн одоо байгаа халуун усны ялтсан бойлерыг узелийн хамт буулгаж өргөтгөлийн хэсэгт хүчин чадал нэмэгдүүлэн шинээр суурилуулна. 

Уг ажлыг мөн адил Болзошгүй аваарын зардалд шилжүүлэн  богино хугацаанд ажлыг гүйцэтгүүлэхээр төсөвт зохицуулалт хийн төлөөлөгчдийн олонхийн саналаар шийдвэрлэлээ. 

Мэдээллийн төв